Արցախի Մարտունի քաղաքի նախկին հիւանդանոցի տարածքին «ՖԵՐԶԻՏ» շինարարական կազմակերպութեան կողմէ լայն թափով կ՛ընթանան բազմաբնակարան նոր թաղամասի շինարարական աշխատանքները։

Այս մասին «Արցախփրես»-ի թղթակցի հետ զրոյցի ժամանակ ըսած է շինարարական կազմակերպութեան տնօրէն Արթուր Խաչատրեանը։

«Ներկայ ժամանակահատուածին առաջին շէնքի 5-րդ հարկի կառուցման շինարարական գործընթացն արդեն աւարտած ենք, ներքին հարդարման աշխատանքներ կը կատարենք: Եկող տարուայ Մարտի կէսին կ՛աւարտենք առաջին շէնքի շինարարութիւնը եւ կը շարունակենք երկրորդ շէնքի շինաշխատանքները: Կը կառուցուին ժամանակակից չափորոշիչներուն համապատասխանող 4 հինգ հարկանի նոր շէնքեր` 116 բնակարաններով՝ 3 եւ 4 սենեակով: Կը կառուցենք նաեւ խաղահրապարակներ, ինքնաշարժի կայանատեղ: Տարածքը կը բարեկարգուի եւ կը պատուի կանաչութիւնով»,- նշած է Ա. Խաչատրեանը եւ հաւելած է, որ բազմաբնակարան նոր թաղամասի շինարարութիւնը նախատեսուած է աւարտել 2023 թուականին: