Ատրպէյճանի արտաքին գործերու նախարարութիւնը պաշտօնական դիւանագիտական ուղիներով դիմած է Google ընկերութեան՝ խնդրելով հրաժարուիլ Արցախի՝ 44-օրեայ պատերազմի հետեւանքով Պաքուի  վերահսկողութեան տակ անցած տարածքներու հայկական անուանումներն օգտագործելէ, որու մասին ըսած է ԱԳՆ մամուլի ծառայութեան ղեկավար Լեյլա Աբտուլաեւան։

Ինչպէս գրած է «ՌԻԱ Նովոստի»-ն, ներկայի Google Maps հաւելուածին մէջ Ատրպէյճանի կողմէ վերահսկուող արցախեան քաղաքներու եւ շրջաններու անունները նշուած են ատրպէյճաներէն եւ հայերէն լեզուներով։

Արեւմտեան Հայաստանը, դէմ ըլլալով նման գործողութիւններուն, կը ցանկանայ ընդգծել, որ արդեն հերթական անգամ Ատրպէյճանը կոպտօրէն կը խախտէ ոչ  միայն միջազգային օրէնքները։ Այդ երկիրը Արցախի եւ առհասարակ հայ ազգի հադէպ անհանդուրժելի ոտնձգութիւններով կրկին ապացուցած է իր զաւթողական ու ցեղասպան քաղաքականութիւնը։ Յուսանք, որ արդարութիւնը կը յաղթի, եւ Google Maps հաւելուածին մէջ Արցախի հայկական տեղանունները կը մնան անփոփոխ։ 

Արեւմտեան Հայաստանի արտաքին գործերու նախարարութիւնը Google-ին համապատասխան նամակ կը ներկայացնէ։