Արցախի նախագահի աշխատակազմի տարածած հաղորդագրութեան համաձայն՝ Արայիկ Յարութունեանն ընդունած է Հադրութի եւ Շուշիի  շարք մը միջնակարգ եւ երաժշտական դպրոցներու աշխատանքային խումբերուն։ Ի դէմս ներկաներուն՝ ան շնորհակալութիւն  յայտնած է Արցախի բռնազաւթուած տարածքներու համայնքներուն ստեղծագործական հաստատութիւններու աշխատակիցներուն, որոնք այս դժուար ժամանակաշրջանին եւ ստեղծուած դժուար պայմաններուն հանդերձ բարեխիղճօրէն կը կատարեն իրենց աշխատանքը՝ տեղահանուած աշակերտներու համար ապահովելով անխափան կրթական գործընթաց։ Արայիկ Յարութունեանը նշած է նաեւ, որ արդեն 2022 թուականի Սեպտեմբերի 1-էն Հադրութի եւ Շուշիի դպրոցներն ու մանկապարտեզները կ՚ունենան նոր առանձին մասնաշէնքեր՝ մայրաքաղաք Ստեփանակերտի մէջ։

Պատասխանելով ուսուցիչներու՝ ապագայի եւ անվտանգութեան վերաբերեալ մտահոգութիւններուն եւ հուզող հարցերուն՝ նախագահը շեշտած է, որ Արցախի ժողովուրդն ու իշխանութիւնները երբեք չեն ընդունիր Ատրպէյճանի կազմին որեւէ կարգավիճակ, իսկ երկրի անվտանգ կենսագործունէութիւնն ապահոված են եւ պիտի ապահովեն Պաշտպանութեան բանակն ու ՌԴ խաղաղապահ զօրակազմը։