Արեւմտեան Հայաստանի մէջ՝ Ամանոս լեռներու ստորոտին գտնուող Այնթապի Ալթըն Ուզիում թաղամասի բնակիչները, փակելով դէպի քարհանք տանող ճանապարհը բողոքի ցոյց իրականացուցած են։ Գործողութիւնն իրականացուած է ուշադրութիւն հրաւիրելու համար 2015 թուականէն գործող CTC ընկերութեան պատկանող «Իսլահիէ պոքսիտի քարհանքի» եւ հորատող կազմակերպութեան պատճառած վնասի վրայ: Իր գործունէութեամբ ձեռնարկութիւնը կ՛ոչնչացնէ բնութիւնը եւ վտանգի կ՛ենթարկէ բնակիչներու առողջութիւնը։

Քաղաքացիները նշած են, որ կազմակերպութեան պատճառով իրենց թաղամասին մէջ  աւելցած են քաղցկեղի դէպքերը։ Անոնց խօսքով՝ յատկապէս չորցած են խաղողի եւ ձիթապտուղի այգիները, քարհանքը բացասաբար  կ՛անդրադառնայ նաեւ գիւղատնտեսական նշանակութեան հողերու վրայ։ Քաղաքացիները կը սպասեն համապատասխան արձագանքի։