Հայաստանի եւ Ատրպէյճանի ղեկավարներու՝ Պրիւսելի մէջ կայացած հանդիպումէն ետք հրապարակուած յայտարարութեան մէջ Արցախի կարգավիճակի, Արցախի մէջ բնակող հայերու մասին յիշատակումներ չկան: Ըստ ՀՀ ԱԺ նախկին պատգամաւոր Թեւան Պողոսեանի՝ այդ հանգամանքը 30 տարիներու պայքարի զրոյացում կը նշանակէ: «Մարդիկ 1988-էն  շարժում սկսած են, հողը պաշտպանելու համար 1991-ին զէնք վերցուցած, անկախութիւն հռչակած են: 30 տարիներշուն արցախահայութիւնն ապահոված է Հայաստանի անվտանգութեան իր բաժինը, իսկ ներկայիս Արցախի մասին խօսք նոյնիսկ չկայ»:

Պողոսեանը չի բացառեր, որ կողմերու միջեւ կարող է նոյնիսկ բանաւոր համաձայնութիւն եղած ըլլայ, որ Արցախ, կարգավիճակ, եզրոյթները չեն յիշատակեր: «Իսկ եթէ այդպէս է, ապա կը նշանակէ, որ Հայաստանի գործող իշխանութիւնները կը սպասարկեն Ատրպէյճանի շահերը»,- նշած է ան։

Յայտարարութեան մէջ ԵԱՀԿ Միսքի խումբի մասին նոյնպէս որեւէ նշում չկայ, իսկ այդ , ըստ Պողոսեանի, կը նշանակէ հրաժարուիլ խօսելու Արցախի կարգավիճակի մասին: