ՀՀ ԱԳՆ-ն յայտարարութիւն տարածած է Մարաղայի կոտորածի 30-րդ տարելիցի կապակցութեամբ: Յայտարարութեան մէջ նշուած է. «30 տարի առաջ՝ 1992 թ․ Ապրիլի 10-ին, Ատրպէյճանի զինուած ուժերու կողմէ իրականացուած է Արցախի Մարտակերտի շրջանի Մարաղայ աւանին մէջ խաղաղ բնակչութեան՝ իր դաժանութեամբ աննախադէպ կոտորածը, որու հետեւանքով շուրջ 5000 բնակչութիւն ունեցող հայկական բնակավայրն ամբողջութեամբ հայաթափուեցաւ։ Մարաղայի կոտորածը, որը դարձաւ Սումգայիթի, Կիրովապատի  եւ Պաքուի մէջ կազմակերպուած հայերու ջարդերու շարունակութիւնը, Ատրպէյճանի իշխանութիւններու կողմէ հայերու նկատմամբ ատելութեան եւ էթնիկ զտումներու քաղաքականութեան հերթական դրսեւորումն էր։ Ներկայիս ատրպէյճանական զինուած ուժերու կողմէ Արցախի մէջ հայ քաղաքացիական բնակչութեան շարունակական թիրախաւորումն ու հումանիտար ճգնաժամ ստեղծելուն ուղղուած գործողութիւնները, ինչպէս նաեւ ս․թ․ Մարտի 24-էն ՌԴ խաղաղապահ ուժերու պատասխանատուութեան գոտի ներխուժումը, որու հետեւանքով աւելի քան 400 անձ ստիպուած տեղահանուեցաւ, կը վկայեն պաշտօնական Պաքուի իրական նպատակի մասին՝ ամբողջական էթնիկ զտումներու ենթարկել Արցախը։

Այսօր մենք յարգանքի տուրք կը մատուցենք Մարաղայի կոտորածներու զոհերու յիշատակին: Հայաստանի Հանրապետութիւնը վերահաստատած է իր յանձնառութիւնը՝ ապահովելու Արցախի ժողովուրդի՝ իր հայրենիքին մէջ ազատ, անվտանգ եւ արժանապատիւ կեանքի իրաւունքը, եւ ընդգծած է միջազգային հանրութեան ջանքերու հրատապութիւնը՝ կանխելու Լեռնային Ղարաբաղի հայութեան էքզիստենցիալ անվտանգութեան համար սպառնալիքները»։