Արցախի Հանրապետութեան պետական նախարար Արտակ Պեգլարեանը դիմատետրի գրառումով հակադարձած է Իլհամ Ալիեւի որոշ յայտարարութիւններուն։

Հակադարձումները կը ներկայացնենք

«Իլհամ Ալիեւը պատմական փաստերու հերթական կեղծումն կատարած է, այս անգամ՝ ԼՂԻՄ-ի ժողովրդագրութեան մասին:

Ատրպէյճանի նախագահը բռնազաւթուած Շուշիի մէջ հերթական միջոցառման ժամանակ, ի թիւս այլ կեղծ պնդումներու, ըսած է, որ խորհրդային տարիներուն Լեռնային Ղարաբաղի Ինքնավար Մարզին մէջ ատրպէյճանական բնակչութիւնը մեծամասնութիւն կազմած էր, այն ինչ իրականութեան հակառակն է:

1. 1921թ. Ղարաբաղի բռնակցման պահին ատրպէյճանական բնակչութիւնը 4% էր, իսկ յետագայ տասնամեակներուն՝ ԽՍՀՄ մարդահամարներու ցուցանիշներով՝ 1926թ.՝ 10.06%, 1989թ.՝ 21.52%: Բնակչութեան մնացած մասը հայեր եղած են եւ շատ փոքր տոկոսով՝ այլ ազգներ: ԽՍՀՄ տարիներուն ԼՂԻՄ-մէյ ատրպէյճանցիներու կայուն աճող թիւը պայմանաւորուած է հայ բնիկ բնակչութեան դէմ իրականացուած սպիտակ ցեղասպանութեամբ: Թող ատրպէյճանական իշխանութիւնները ընդմիշտ յիշեն, որ Արցախի մէջ երեք հազար տարի շարունակ եղած է բացառապէս հայկական ճնշող մեծամասնութիւն»։