Սիւնիքի մարզպետ Ռոբերտ Ղուկասեանն ընդունած է Հայաստանի մէջ Իրանի արտակարգ եւ լիազոր դեսպանպան Ապաս Պատախշան Զոհուրիին։ Հանդիպման  քննարկուած  հիմնական նիւթը Կապանի մէջ Իրանի բացուելիք հիւպատոսութիւնն էր: 

Հանդիպման ժամանակ դեսպանը մասնաւորապէս ըսած է․ «Սիւնիքի մէջ հիւպատոսարան բանալու նպատակը տարբեր ոլորտներուն մէջ յարաբերութիւնները զարգացնելն է…Շատ կը կարեւորենք Հիւսիս-Հարաւի Սիւնիքով անցնող ճանապարհի կառուցումը…Չնայած կան երկիրներ, որոնք չեն ցանկանար, որ Հիւսիս-Հարաւի Միջանցքը անցնի Հայաստանով, բայց Իրանի համար այդ կարեւոր է։

Պէտք է յարգել միջազգային սահմանները…Կովկասի մէջ շատ զարգացումներ տեղի ունեցած են, յատկապէս ձեր մարզի հետ կապուած, այդ առիթով Իրանը հստակ արտայայտած է իր դիրքորոշումը: Մենք դէմ ենք միջանցքային տրամաբանութեան եւ կը պաշտպանենք Հայաստանի տարածքային ամբողջականութիւնը»:

Կողմերը խօսած են նաեւ հիւպատոսութեան բացումէն ետք սպասուող նոր մակարդակի համագործակցութեան շարք մը ուղղութիւններու մասին՝ քննարկելով տնտեսական, կրթական, մշակութային եւ այլ հարցեր։