Ռուսաստանի արտգործնախարարի տեղակալ Անտրեյ Ռուտենկոն չէ բացառած Հայաստանի, Ռուսաստանի, Ատրպէյճանի ղեկավարներու նոր եռակողմ հանդիպում կազմակերպելը Արցախի հիմնախնդիրի կարգաւորման հարցերը քննարկելու նպատակով: Ինչպէս հաղորդած է «Արմենփրես»-ը՝ այդ մասին Ռուտենկոն ըսած է «ՏԱՍՍ»-ին հետ հարցազրոյցին: «Մենք կը շարունակենք համակարգուած աշխատանքը բոլոր մակարդակներով՝ 2020 թ. Նոյեմբերի 9-ին, 2021 թ. Յունուարի 11-ին եւ 2021 թ. Նոյեմբերի 26-ին ամենաբարձր մակարդակով ձեռք բերուած եռակողմ համաձայնագիրները իրագործելու ուղղութեամբ: Առաջնորդները միշտ կապի մէջ են: Չենք բացառեր դէմ առ դէմ հանդիպում կազմակերպելը անհրաժեշտութեան առաջացնելու պարագային: Մայիսի 12-ին Տուշանպէի մէջ՝ ԱՊՀ ԱԳ նախարարներու խորհուրդի նիստի շրջանակներուն, Սերգեյ Լաւրովը քննարկած է Պաքուի եւ Երեւանի միջեւ յարաբերութիւններ կարգաւորելու հարցերու ողջ շրջանակը Հայաստանի եւ Ատրպէյճանի գործընկերներու հետ», – ըսած է Անտրեյ Ռուտենկոն: