Կոմիտասի թանգարան-համալսարանին մէջ բացուեցաւ «Նուիրուած Կոմիտասին» խորագիրով ժամանակաւոր ցուցադրութիւն՝ նուիրուած Եղիշէ Չարենցի ծննդեան 125-ամեակին:

Ցուցադրութեան ներկայացուած են պատառիկներ Չարենցի «Կոմիտասի յիշատակին. Requiem Aeternam» պոեմի ձեռագւրէն, որոնք նուիրաբերուած են Կոմիտասի թանգարան-համալսարանին: Ցուցադրուած է նաեւ Գեւորգ Գրիգորեանի «Չարենցը եւ Կոմիտասը» կտաւը։

Ձեռագրերու մասին տեղեկութիւններ հաղորդելով՝ բանաստեղծի թոռնուհի Գոհար Չարենցն ըսաւ, որ Չարենցը երբեք չէ հանդիպած Կոմիտասին եւ առաջին անգամ տեսած է, երբ Կոմիտասի աճիւնը մահէն ամիսներ ետք հասաւ Հայաստան: 

Ձեռագիրը Չարենցի բազմաթիւ այլ գործերու հետ  հողի տակ պահած է ՀԽՍՀ վաստակաւոր նկարչուհի, Չարենցի մտերիմ ընկեր Ռեգինա Ղազարեանը: Ստեղծագործութիւնները հողի տակ մնացած է 17 տարի: Անոնք դուրս հանեցին Կոմունիստական կուսակցութեան առաջնորդ Իոսիֆ Ստալինի մահէն ետք: Մէկ մասը ոչնչացած է եւ հնարաւոր չէ եղած վերականգնել, սակայն «Կոմիտասի յիշատակին. Requiem Aeternam»  պոեմը բաւականին լաւ վիճակի մէջ  եղած է: