Մարդու իրաւունքներու պաշտպան Քրիստինէ Գրիգորեանը Մայիսի 20-ին ընդունած է ՄԱԿ-ի Մարդու իրաւունքներու հարցերով գերագոյն յանձնակատարի գրասենեակի Հարաւային Կովկասի մէջ Մարդու իրաւունքներու հարցերով գլխաւոր խորհրդական Վլատիմիր Շկոլնիկովին եւ Հայաստանի մէջ ՄԱԿ-ի մշտական համակարգողի գրասենեակի ղեկավար Տենիս Սումփֆին։

Ինչպէս տեղեկացուցած են ՀՀ մարդու իրաւունքներու պաշտպանի աշխատակազմէն, մանդատներու ընդհանրութիւնները հաշուի առնելով՝ Վլատիմիր Շկոլնիկովն իր պատրաստակամութիւնն յայտնած է աջակցելու Հայաստանի մարդու իրաւունքներու պաշտպանին իր գործունէութեան ընթացքին եւ աւելի խորացնելու համագործակցութիւնը։

«Պաշտպան Գրիգորեանը Վլատիմիր Շկոլնիկովին ներկայացուցած է իր մանդատի ժամանակ առանձնացուած առաջնահերթութիւնները, ինչպէս նաեւ անդրադարձած է Ատրպէյճանի մէջ պահուած հայ ռազմագերիներու եւ քաղաքացիներու, անյայտ կորած անձերու ընտանիքներու խնդիրներուն»,- կ՛ըսուի հաղորդագրութեան մէջ։