Սեպտեմբերի 12-էն Տերսիմի նահանգապետ նշանակուած Քենան Գիւենն սկսած էր «Իւրաքանչիւր գիւղին մէջ մէկ մզկիթ» նախագիծը։ Այժմ  ուծացման կենտրոններ կը հիմնեն գաւառներուն  եւ քաղաքի տարբեր հատուածներուն մէջ։

Նշելով, որ Տերսիմի մէջ պետութեան կողմէ իրականացուող ձուլման քաղաքականութիւնը կը շարունակէ օրէ օր աւելնալ, Դեմոկրատ Ալեւիներու Միութեան համանախագահ Մուսա Քուլուն ըսաւ, որ պետութեան նպատակն է ոչնչացնել տերսիմցիներու հաւատքը, լեզուն եւ յիշողութիւնը՝ մարդկանց կենցաղին մէջ իսլամական ծէսերը ամրապնդելու միջոցով։ Պետութիւնն իր վստահած՝ այսպէս կոչուած, «ալեւիներուն» հետ փորձած է վերջ տալ Տերսիմի մէջ ալեւիութեան։ Պատահական չէ, որ միայն Տերսիմէն դէպի Մեքքա  ուխտագնացութեան ուղարկած են 500 առաջնորդի, որոնք ժողովուրդի լեզուով կոչուած են Alevi dede (Ալեւի պապ)։

«Պետութիւնը կը փորձէ վերջ տալ ալեւիականութեան Տերսիմի մէջ՝ մշակելով տարբեր քաղաքականութիւններ»,- ըսած է Ալեւիներու եւրոպական միութիւններու կոնֆետերացիայի իրաւահաւասար նախագահ Նեւին Քամիլաղաօղլուն եւ հաւելեց. «Մենք լաւ գիտենք, թէ ինչպէս Տերսիմի  Ջեմեւի մէջ (Ալեւիներու հաւաքատեղի, խմբ․) կ՛աշխատին պետականամետ մարդիկ՝ համագործակցելով համայնքի Alevi dede (Ալեւի պապ) ներկայացող մարդկանց հետ։ Այս ամենը միտուած է Տերսիմի սոցիալական կառուցուածքի փոփոխութեան։ Մենք գիտենք նաեւ, որ այնտեղ երիտասարդներուն կ՛ուղղորդեն դէպի յանցագործ աշխարհ»։