Հայաստանի կոմպոզիտորներու միութեան նախաձեռնութեամբ, «Գալուստ Կիւլպէնկեան Հիմնարկութեան» աջակցութեամբ՝ Յուլիսի 23-27-ը Սիւնիքի եւ Արցախի սահմանամերձ բնակավայրերուն մէջ տեղի պիտի ունենայ «Երաժշտութիւն յանուն խաղաղութեան եւ յոյսի» խորագիրը կրող նախագիծը, որուն եզրափակիչ համերգը պիտի կայանայ Յուլիսի 27-ին Ստեփանակերտի մէջ: Հայաստանի կոմպոզիտորներու միութեան անդամ շարք մը կոմպոզիտորներ միութեան նախագահ Արամ Սաթեանի գլխաւորութեամբ հանդիսատեսին պիտի ներկայացնեն իրենց ստեղծագործութիւնները՝ իրենց իսկ կատարմամբ: Բեմ պիտի բարձրանան նաեւ տարբեր այլ մենակատարներ:

Նախագիծի մեկնարկը պիտի տրուի Շինուհայր գիւղէն՝ Յուլիսի 23-ին: Ստեփանակերտի մէջ կայանալիք համերգը տեղի պիտի ունենայ Սայեաթ-Նովայի անուան երաժշտական ուսումնարանի համերգասրահէն ներս: