ԱՄՆ Արտաքին գործոց նախարարութեան ներկայացուցիչ Նէտ Փրայս ճեպազրոյցի  ժամանակ պատասխանած է Երեւանի եւ Պաքուի յարաբերութիւններու կարգաւորման հարցին մէջ ԱՄՆ դերին մասին հարցումին։ «Մենք մշտապէս յայտարարած ենք, որ պատրաստ ենք փոխգործակցիլ երկկողմ հիման վրայ եւ գործընկերներու հետ, այդ թուին՝ ԵԱՀԿ Մինսկի խումբի համանախագահի մեր դերով, որպէսզի օգնենք երկիրներուն հասնիլ երկարաժամկէտ եւ համապարփակ խաղաղութեան»,- ըսած է Նէտ Փրայս։

«Արտաքին գործոց նախարարի օգնական Քարէն Տոնֆրիտ եւ այլք հնարաւորութիւն ունեցած են բարձր մակարդակով շփում ունենալ իրենց հայ եւ ատրպէյճանցի գործընկերներուն հետ։ Մենք ողջունած ենք Հայաստանի եւ Ատրպէյճանի ԱԳՆ ղեկավարներու հանդիպումը։ Մենք կը կարծենք, որ երկխօսութիւնը խաղաղ, ժողովրդավարական եւ բարգաւաճ ապագայի հասնելու լաւագոյն միջոցն է Հարաւային Կովկասի տարածաշրջանին համար, եւ մենք պիտի շարունակենք աջակցիլ անոր հնարաւոր բոլոր եղանակներով», ըսած է ան։