Քաղաքագէտ Հրանդ Մելիք-Շահնազարեան գրած է. «Յուլիսի 16-ին Թիֆլիսի մէջ տեղի  ունեցած է Հայաստանի եւ Ատրպէյճանի արտաքին գործոց նախարարներու՝ մօտ երեք ժամ տեւած հանդիպումը։ Երկու երկիրներու արտաքին գերատեսչութիւններու տարածած համանման, բայց անբովանդակ յայտարարութիւնն առիթ տուած էր կարծելու, որ իրական պայմանաւորուածութիւններու մասին կողմերը լռած են։

Եւ ահա ՀՀ ԱԽ քարտուղարն այսօր յայտարարեց, որ «պատերազմի բերումով Արցախ մուտք գործած ՀՀ ԶՈՒ ստորաբաժանումները կը վերադառնան Հայաստան»։

Բայց քանի որ իմ տեղեկութիւններուս համաձայն Արցախի մէջ ՀՀ ԶՈՒ ստորաբաժանումներ չկան, իսկ ժամկէտային զինծառայողներու զօրացրումը քաղաքական յայտարարութեան առիթ չէ, ուրեմն կարելի է ենթադրել, որ քննարկուող հարցը շատ աւելի բովանդակային է, քան կրնայ թուիլ առաջին հայեացքէն։ Այս պարագային խօսքը կրնայ վերաբերիլ միայն Արցախի զինաթափման։ Վստահ եմ՝ «ՀՀ ԶՈՒ ստորաբաժանումներ» ըսելով՝ այս իշխանութիւնները նկատի ունին Արցախի մէջ գտնուող ռազմական տեխնիկան, որուն դուրս բերումը ատրպէյճանական կողմին՝ երկար ժամանակէ ի վեր ձեւակերպուած պահանջներէն մէկն է»։