Յուլիսի 19-ին պաշտօնական այցով Վարշաւա  գտնուող Հայաստանի Հանրապետութեան ԱԳ նախարար Արարատ Միրզոյեան հանդիպում ունեցած է Լեհաստանի Հանրապետութեան Սենատի նախագահ Թոմաշ Կրոծքիի հետ:

Հանդիպման ընթացքին անդրադառնալով 44-օրեայ պատերազմին հետեւանքով առաջացած մարդասիրական խնդիրներուն, նախարար Միրզոյեան շեշտած է Ատրպէյճանի  մօտ ապօրինաբար պահուող հայ ռազմագերիներու եւ քաղաքացիական անձերու անհապաղ ազատ արձակման եւ հայրենադարձման, ինչպէս նաեւ ատրպէյճանական վերահսկողութեան տակ անցած տարածքներուն մէջ հայկական պատմամշակութային եւ կրօնական ժառանգութեան պաշտպանութեան անհրաժեշտութիւնը:

Ընդգծուած է, որ Լեռնային Ղարաբաղի հակամարտութիւնը պէտք է իր լուծումը գտնէ խաղաղ ճանապարհով՝ բանակցութիւններու սեղանին շուրջ: 

Թոմաշ Կրոծքի պատրաստակամութիւն յայտնած է աջակցելու խաղաղութեան հասնելու ջանքերուն։

Արեւմտեան Հայաստանը կը կարեւորէ նման կապերու ամրապնդումը եւ կը յիշեցնէ, որ այո՛ գերիներու հարցը այսօր առաջնային է, քանզի այն կ’ազդէ ժողովուրդին ընդհանուր բարոյահոգեբանական վիճակին վրայ։ Յիշեցնենք, որ 2005 թուականին Լեհաստան ճանչցած եւ դատապարտած է հայերու դէմ իրագործուած Ցեղասպանութիւնը։