Արեւմտեան Հայաստանի Կարս քաղաքին մէջ գանձ որոնողները քանդած են պատմական եկեղեցին։

Եկեղեցին կը գտնուի Կարսի ամրոցի փէշերուն։ Անյայտ անձեր ոչ միայն քանդած են եկեղեցւոյ պատերը, այլեւ փորած են ներսն ու շրջակայքը, կոտրելով քարերը։ Եկեղեցւոյ պատերէն գրեթէ ոչինչ մնացած է։

Յիշեցնենք, որ Կարսի 150-ամեայ եկեղեցին վերջին քանի մը տարիներուն մասամբ աւերուած էր։

Արեւմտեան Հայաստանը իր խոր մտահոգութիւնը կը յայտնէ այս դէպքին առթիւ, հրաւիրելով միջազգային հանրութեան  ուշադրութիւնը։  Արեւմտեան Հայաստանի տարածքին այս միակ դէպքը չէ, երբ հաւանաբար նաեւ յատուկ պատուէր ստացած գանձագողերը կ’աւերեն հայկական մշակոթային կոթողները՝  գանձագողութեան նպատակով։