Ինչպէս աւելի շուտ  տեղեկացուցած էինք, Արեւմտեան Հայաստանի Տերսիմ քաղաքին մէջ պիտի կայանար «Մնձուրի բնութիւնը եւ մշակոյթը» խորագիրը կրող 20-րդ փառատօնը։

Տերսիմի նահանգապետարանը  փառատօնի մասնակիցներու համար որոշ արգելքներ  սահմանած է, բան մը, որ առաջ բերած է կազմակերպիչներուն եւ մասնակիցներուն դժգոհութիւնը։

Փառատօնի կազմակերպիչ կոմիտէն, բողոքելով Տերսիմի նահանգապետարանին արգելքներուն դէմ, որոշած է չեղարկել Տերսիմի կեդրոնը կազմակերպուելիք փառատօնը։ Փառատօնին համար քաղաք ժամանած հազարաւոր մարդիկ երթի դուրս եկած են՝ ընդդէմ նահանգապետարանին կողմէ սահմանուած արգելքներուն։

Բողոքի խօսքով հանդէս եկած են Տերսիմի քաղաքապետ Ֆաթիհ Մեհմէտ Մաչօղլու, Ալեւիներու դաշնակցութեան նախագահ Մուսթաֆա Արսլան եւ տարբեր կուսակցութիւններու ու հասարակական կազմակերպութիւններու ներկայացուցիչներ։ Անոնք իրենց խօսքին մէջ գլխաւորաբար պահանջած են ժողվրդավարութիւն Տերսիմի մէջ, ինչպէս նաեւ տարբեր ազգերու մշակոյթի եւ հաւատքներու հանդէպ յարգանք եւ ըմբռնողութիւն։ 

Բողոքի երթի կազմակերպիչները աւարտին շնորհակալութիւն յայտնած են բոլոր անոնց, որոնք կազմակերպած են փառատօնի աշխատանքը։