ՀՀ Տնտեսութեան նախարարի տեղակալ Արմէն Արզումանեան ընդունած է Հայաստանի մօտ Լեհաստանի արտակարգ եւ լիազօր դեսպան Փաւէլ Չեփլաքը՝ տնտեսութեան ոլորտին մէջ երկկողմ համագործակցութեան հեռանկարները քննարկելու նպատակով։ ՀՀ տնտեսութեան նախարարութիւնը կը տեղեկացնէ, որ զրուցակիցներն անդրադարձած են առեւտուրի ոլորտին մէջ փոխգործակցութեան աշխուժացման, ապրանքաշրջանառութեան ծաւալներու աւելացման, ինչպէս նաեւ այս ուղղութեամբ երկկողմ ցուցանիշներու բարելաւման։ Հանդիպման ընթացքին Արմէն Արզումանեան առաջարկած է դիտարկել Լեհաստանի մօտ Հայաստանի առեւտրային ներկայացուցչութեան ստեղծման հնարաւորութիւնը։ Քննարկուած են նաեւ մինչեւ տարեվերջ հայ-լեհական միջկառավարական յանձնաժողովի նիստի կազմակերպման առնչուող հարցեր։