Յուլիսի 23-ին,  Ախալքալաքի շրջանի Կարծախ գիւղին մէջ նշուած է մեծ ճանաչում ունեցող Աշուղ Ջիւանիի տօնը։  

Ջաւախքի մէջ վաղ շրջանէ եկող աւանդոյթ դարձած է հայ մեծ Աշուղ Ջիւանիի յիշատակին նուիրուած տօնը մեծ շուքով նշելը։ Տօնակատարութիւնը սկիզբ առած է գիւղին մէջ տեղադրուած Աշուղ Ջիւանիի յուշարձանին ծաղիկներ խոնարհելով։ Հիւրերը ուղեւորուած են մեծն կարծախցիի տուն-թանգարանը։ Թանգարանին մէջ հիւրերը ողջունած է Աշուղ Ջիւանիի թանգարանի աշխատակից Յասմիկ Սաղաթելեան, որ հիւրերուն պատմած է Կարծախ գիւղին մէջ Աշուղ Ջիւանիի կեանքին եւ շատ այլ մանրամասներու մասին։ Յետոյ սկսած է տօնակատարութեան համերգային մասը: Հիւրերն ու ներկաները ողջունած է Ախալքալաքի քաղաքապետ Մելքոն Մակարեան։ Ջիւանիի տօնին ելոյթ ունեցած են Ախալքալաքի Մշակոյթի տան «Ջաւախք» պարային համոյթը՝ աշուղ Ալիք Ջաւախքի ղեկավարութեամբ, Ախալքալաքի աշուղական դպրոցի սաները եւ Աշուղ Ջիւանիի անուան Կարծախ գիւղի պարային համոյթը։