«Որպէս Կլենտէլի քաղաքապետ, որոշեցի խորհրդանշական կապ ամրագրել Կլենտէլի եւ Արցախի Հանրապետութեան Մարտունի քաղաքին միջեւ: Երբ Ապրիլին ստանձնեցի քաղաքապետի պաշտօնը, նամակ ստացայ, ուր Մարտունիի քաղաքապետը կ’առաջարկէր հաստատել քոյր քաղաքներու կարգավիճակ: Ես ներկայացուցի առաջարկը քաղաքական խորհուրդի նիստին, եւ յոյսով եմ, որ մինչեւ Հոկտեմբեր այն պիտի հաստատուի», «Ասպարէզ»ին հետ բացառիկ հարցազրոյցի ժամանակ յայտնած է Կլենտէլի քաղաքապետ Արտաշէս Քասախեան: «Գրեթէ մէկ շաբաթ չ’անցնիր, առանց լուրերու, որ թուրք-ատրպէյճանական ուժերուն կողմէ յարձակում իրականացուած է Արցախի հայ խաղաղ բնակավայրերուն վրայ: Եւ մենք այստեղէն, ինչպէս պատերազմի ժամանակ, երբ հեռուէն կը հետեւէինք գործընթացներուն, մենք մեզ թոյլ կը զգանք՝ անկարող ըլլալով շօշափելի օգնութիւն ցուցաբերելու: Կլենտէլէն քանի մը բժիշկներ պատերազմի ժամանակ առաջնագիծի վրայ էին, եւ առաջին օգնութիւն կը ցուցաբերէին մեր զինուորներուն», նշած է Քասախեան։ Ան յայտնած է, որ ինք ալ որպէս քաղաքապետ, որոշած է Կլենտէլի եւ Մարտունիի միջեւ քոյր քաղաքներու կարգավիճակի հաստատումով ներդրում ունենալ Արցախի մէջ: «Այս քայլը ցոյց կու տայ, որ մենք  նման յարաբերութիւն ունինք ոչ միայն այն քաղաքներուն հետ, որոնք կը գտնուին Հայաստանի սահմաններուն մէջ, ինչպէս նաեւ՝ Արցախի մէջ, զոր ես անձամբ կը համարեմ Հայաստանի, մեր պապենական հողերու եւ անոնց ժառանգութեան մաս, անկասկած է այն փաստը, որ Արցախը հայկական հող է, եւ Մարտունին հայկական քաղաք, որ ունեցած է, ունի, եւ պէտք է ունենայ հայ բնակչութիւն»:

Leave a Reply