Ամերիկեան հեղինակաւոր «CNN»ը իր ճանապարհորդական շարքի ծիրին մէջ առանձնացուցած է աշխարհի լաւագոյն արշաւային ուղղութիւններէն՝ արահետներէն 23-ը՝ ցանկին մէջ ներառելով նաեւ Հայաստանը: Հայաստանին վերաբերող հատուածը վերնագրուած է՝ «Հայաստանը եւ Մետաքսի ճանապարհը» ուր  ընդգծուած է, որ Հայաստանի մէջ կը գտնուին Եւրոպայի լաւագոյն արահետներէն մէկ քանին: «Հայաստանն ու Մետաքսի ճանապարհը» 11-օրեայ ճանապարհորդութիւնը կ’անցնի լաւագոյն երթուղիներով՝ միացնելով «ԵՈՒՆԵՍՔՕ»ի պահպանութեան տակ գտնուող Սանահին եւ Հաղպատ վանքերը, անցնելով կրաքարային լեռնագագաթներով եւ սաղարթախիտ անտառներով՝ Գեղամայ վայրի լեռներուն մէջ՝ քայլարշաւի, եւ երկրին ամենաբարձր լեռը՝ Արագածի գագաթը բարձրանալու հնարաւորութեամբ»,- ըսուած է յօդուածին մէջ: Ցանկին մէջ ընդգրկուած են նաեւ ուղղութիւններ Միացեալ Թագաւորութեան, Սպանիոյ, Միացեալ Նահանգներու, Արժանթինի, Մարոքի եւ այլ երկիրներու մէջ: