Շուշիէն տեղահանուած թատերական 4 գործիչներ շրջիկ թատրոն հիմնած են եւ ստուերներու իւրօրինակ խաղով հանդէս կու գան ՀՀ եւ Արցախի մէջ։ Անոր զուգահեռ իրենց ընկերային խնդիրները հոգալու համար մեղուապահութեամբ կը զբաղին, որ փոքրիկ  արհեստ ըլլալէն բացի, նաեւ հոգեբանական բուժում է։

Կորսնցուցած են տուն, տեղ, աշխատանք, բայց չեն կորսնցուցած հաւատքն ու կենսասիրութիւնը, գտած են ոյժ՝ ամէն ինչ զէրոյէն սկսելու։ Շուշեցի քանի մը թատերական գործիչներ Հայաստան տեղափոխուելէ ետք որոշեցին շարունակել սիրելի գործը, բայց ոչ թէ թատրոններէն որեւէ մէկուն մէջ, այլ իրենցը ստեղծել։ Այդպէս երկրորդ կեանք ստացաւ դեռ Շուշիի մէջ հիմնադրուած «Հեքիաթներու տուն»ը, բայց այս անգամ անիւներու վրայ՝ որպէս շրջիկ թատրոն։ 

Այս պատմութիւնը չորսով սկսած են․ բեմադրիչ Հայկ Պապեան, նկարիչ Արտակ Պօղոսեան եւ դերասաններ Նուէր Ղարաբեկեան ու Գայեանէ Առուշանեան։

Սեփական ձեռքերով պատրաստած են փայտէ տիկնիկներ ու ստուերներու ներկայացում բեմադրած Յովհաննէս Թումանեանի «Մի կաթիլ մեղրը» ստեղծագործութեան հիման վրայ։ Ստեղծագործութեան ընտրութիւնն ալ պատահական չէ եղած․ Թումանեանի «Մի կաթիլ մեղրը» մեծ կռուի պատճառ դարձաւ, բայց եկուր տես, որ այս ներկայացման մէջ մեղուն աւերակներու մէջէն կաթիլ մը յոյս կը գտնէ, որ նոր կեանքի սկիզբ կը դառնայ։

Leave a Reply