ՄԱԿ-ի Գլխաւոր համախմբման 76-րդ նստաշրջանի նախագահ Ապտուլլա Շահիտիի գլխաւորած պատուիրակութիւնը Յուլիսի 27-ին այցելած է Հայերու Ցեղասպանութեան յուշահամալիր՝ ՀՀ ԱԳ նախարարի տեղակալ Վահէ Գէորգեանի, ՄԱԿ-ի մօտ ՀՀ մշտական ներկայացուցիչ Մհեր Մարգարեանի եւ Երեւանի մէջ ՄԱԿ-ի մշտական համակարգողի ժամանակաւոր պաշտօնակատար Լիլա Փիթրս Եահիայի ուղեկցութեամբ: Հայերու Ցեղասպանութեան թանգարանը կը տեղեկացնէ, որ հիւրերը դիմաւորած եւ յուշահամալիրի ստեղծման պատմութիւնը ներկայացուցած է Հայերու Ցեղասպանութեան թանգարանի տնօրէն Յարութիւն Մարութեան: Ան հիւրերուն ներկայացուցած է նաեւ Ծիծեռնակաբերդի տարածքին տեղադրուած երեք խաչքարերու պատմութիւնը, որոնք նուիրուած են անցեալ դարավերջին Ատրպէյճանի տարածքին հայ բնակչութեան նկատմամբ իրականացուած ցեղային զտումներու ընթացքին զոհուած հայերու յիշատակին: Ապտուլլա Շահիտ ծաղկեպսակ դրած է Հայերու Ցեղասպանութեան զոհերու յիշատակը յաւերժացնող յուշակոթողին, այնուհետեւ հիւրերը ծաղիկներ դրած են անմար կրակին մօտ եւ մէկ վայրկեան լռութեամբ յարգած Հայերու Ցեղասպանութեան մէկուկէս միլիոն անմեղ զոհերու յիշատակը: Պատուիրակութեան անդամները շրջած են նաեւ Հայերու Ցեղասպանութեան թանգարանին մէջ, ուր թանգարանի աւագ զբօսավար Յասմիկ Մարտիրոսեանի ուղեկցութեամբ ծանօթացած են մշտական եւ ժամանակաւոր ցուցադրութիւններուն, որմէ ետք Ապտուլլա Շահիտ գրառում կատարած է պատուաւոր հիւրերու յուշամատեանին մէջ: Շնորհակալութիւն յայտնելով այցին համար, թանգարանի տնօրէն Յարութիւն Մարութեան պատուաւոր հիւրին նուիրած է Հայերու Ցեղասպանութեան մասին գիրքեր: Իր հերթին պարոն Ապտուլլա Շահիտ շնորհակալութիւն յայտնած է ջերմ ընդունելութեան եւ հետաքրքրական շրջայցին համար:

Leave a Reply