Կ. Պոլսոյ մէջ հայ մանուկներուն համար հայրենի օճախ դարձած «Քամփ Արմէն» որբանոցի վերանորոգման հիմքերը պիտի դրուին այս տարուան Հոկտեմբերին։ Այս ճամբարին մէջ, ուր միաժամանակ կրնայ 100 պատանի ապրիլ, ծրագրուած է ստեղծել նաեւ մշակութային կեդրոն եւ գրադարան։ Այս ճամբարին մէջ անցած է «Ակօս» շաբաթաթերթի հիմնադիր եւ գլխաւոր խմբագիր Հրանդ Տինքի մանկութիւնը։

Կ. Պոլսոյ Թուզլա թաղամասին մէջ հայ մանուկներուն համար 1962թ․ կառուցուած «Քամփ Արմէն» որբանոցի վերանորոգումը պիտի կատարուի Ամերիկայի հայ բողոքական եկեղեցիներու միութեան աջակցութեամբ։

Յիշեցնենք, որ թրքական պետութիւնը տարիներ առաջ կը փորձէր վերացնել այս որբանոցը, որ տարիներ շարունակ ամառնային ճամբար եղած էր հայ երեխաներուն համար։ Սակայն պոլսահայ համայնքի ջանքերուն եւ պայքարին շնորհիւ որբանոցի սեփականութեան վկայականը յանձնուեցաւ Կետիկփաշայի հայ բողոքական եկեղեցւոյ հիմնադրամին։

Հայ համայնքին համար այս իրական յաղթանակ է, եւ հակառակ Թուրքիոյ գործադրած ջանքերուն, մանկատան շէնքը ի վերջոյ մնաց հայերուն: 

Leave a Reply