Արցախի Հանրապետութեան պետական նախարար Արտակ Բեգլարեան Յուլիսի 30-ին Ասկերանի շրջանի Դահրաւ գիւղին մէջ մասնակցած է «100 տուն Արցախի մէջ» ծրագիրի բնակարանամուտի արարողութեան, որուն ծիրին մէջ տեղահանուած 6 ընտանիք ստացած է նորակառոյց բնակարաններու բանալիները:

 Ինչպէս կը յայտնեն ԱՀ պետական նախարարի աշխատակազմի տեղեկատւութեան եւ հասարակայնութեան հետ կապերու բաժինէն, պետական նախարարը շնորհաւորած է տանտէրերը եւ ծրագիրի նախաձեռնող խումբը՝ Հայաստանի հանրային հեռուստաընկերութիւնն ու «Ապրելու Արցախ» հիմնադրամը, բոլոր նուիրատուներն ու աջակիցները՝ Արցախի ժողովուրդին կողքը հաստատուն կանգնելու առաքելութեան ծիրին մէջ ցուցաբերուած նիւթական ու բարոյական աջակցութեան համար:

Նշուած 6 տուները կառուցուած են ԱՀ կառավարութեան եւ «Ապրելու Արցախ» հիմնադրամի համատեղ օժանդակութեամբ, որոնցմէ իւրաքանչիւրի նուիրատուներն  եղած են Հայաստանի Հանրային հեռուստաընկերութիւնը, Երեւանի քաղաքապետարանը, Երեւանի պետական համալսարանը, «Երեմեան Փրոճէքթս», «Արմսուիսբանկ» եւ «Տիճիթէյն» ընկերութիւնները։

Արեւմտեան Հայաստանը կը շնորհաւորէ բնակարանամուտ տօնող մեր հայրենակիցները եւ կը մաղթէ, որ մնան ու շէնցնեն հայրենի Արցախը: