2022թ. Օգոստոսի 1-էն Արցախի Հանրապետութեան տարբեր ուղղութիւններով ատրպէյճանական կողմը վարած է թշնամական ռազմական գործողութիւններ՝ կիրառելով տարբեր տրամաչափի զինատեսակներ, նռնականետեր, հարուածային անօդաչու թռչող սարքեր։  Այս մասին ֆէյսպուքի իր էջին գրառում կատարած է ԱՀ մարդու իրաւունքներու պաշտպան Գեղամ Ստեփանեան:  «Այս ամէնը կը կատարուի այն պարագային, երբ 2020 թուականի Նոյեմբերէն կողմերու համաձայնութեամբ հաստատուած է հրադադար եւ Արցախի մէջ տեղակայուած են ռուսական խաղաղապահ ուժեր՝ Արցախի ժողովուրդի խաղաղութիւնն ապահովելու համար։  Այս կը խօսի այն մասին, որ խաղաղութիւնը Արցախի մէջ պատշաճ կերպով չէ հաստատուած, իսկ ատրպէյճանական կողմը չի կատարեր յայտարարութեամբ ստանձնած պարտաւորութիւնները՝ ամենատարբեր առիթներ օգտագործելով ուժի կիրառմամբ այս կամ այն հարցերուն շուրջ զիջումներ պարտադրելով։ Արցախի ժողովուրդն իր իրաւունքներուն պաշտպանութեան համար կրկին կը պայքարի միայնակ։

Աշխարհի այլ կէտերուն մէջ տեղի ունեցող հակամարտութիւններուն վերաբերեալ միջազգային մետիան մէկ վայրկեան անգամ չի լռեր, միջազգային կազմակերպութիւնները հանդէս կու գան յայտարարութիւններով, աննկարագրելի ծաւալներու աջակցութիւն կը ցուցաբերեն, իսկ Արցախի ժողովուրդին, որ տասնեակ տարիներով ուղղակի կը պայքարի ատրպէյճանական բռնապետութեան դէմ, կ’անտեսեն։  Միջազգային կառոյցներու յարգելի՛ գործընկերներ, ձեր անհետեւողականութեան, հակամարտութիւնը փորձագիտական դաշտին մէջ քննարկելէ այն կողմ չանցնող գործողութիւններուն հետեւանքով Ատրպէյճան ինքզինք անպատժելի կը զգայ ու կը դիմէ ամենատարբեր լկտիութիւններու։ Միթէ կարելի՞ է այսքան բացայայտ երկակի չափանիշներով առաջնորդուիլ, միթէ կարելի՞ է քաղաքական շահերէ կուրանալ ու անտեսել մարդիկն ու անոնց իրաւունքները»,- գրած է Ստեփանեան։

Leave a Reply