Հայերու  ցեղասպանութեան ականատեսներու ժառանգ ֆրանսահայ լուսանկարիչ Անթուան Ագուճեան տարիներ շարունակ տեսախցիկի միջոցով աշխարհին կը ներկայացնէ Հայաստանն ու հայերու ժառանգութիւնը: Լուսանկարիչը կ’անդրադառնայ ոչ միայն Հայաստանին, այլեւ այն երկիրներու, որոնք այս կամ այլ ժամանակահատուածի անմիջական կապ ունեցած են հայերու հետ: Անթուան Ագուճեանի լուսանկարներուն մէջ մարդու տառապանքն է, ցաւը, սերն ու հաւատքն առ Աստուած: Անթուան Ագուճեան պատմած է լուսանկարչութեան կարեւորութեան, 1988 թուականի երկրաշարժի, Արցախեան 44-օրեայ պատերազմի ընթացքին կատարած աշխատանքին, ինչպէս նաեւ «Լռութեան ճիչը. հայ յիշողութեան հետքերը» խորագիրը կրող ցուցահանդէսին մասին, որ կ’ընդգրկէ հեղինակին 30-ամեայ որոնումները եւ կը հետագծէ հայկական յիշողութիւնը, որ Ագուճեան ժառանգած է Հայերու ցեղասպանութենէն փրկուած ծնողներէն:

Ան Հայերու ցեղասպանութիւնը վերապրածներու երրորդ սերունդին կը պատկանի:  Անթուան Ագուճեան ծնած է Ֆրանսայի Ալֆորվիլ քաղաքը,  ուր շատ են հայերը, եւ որուն արդիւնքով Ագուճեան մանուկ տարիքէն իւրացուցած է հայկական աւանդոյթները, երգն ու պարը:  «Քաղաքին  մէջ հայկական պարախումբեր կային, եւ ես կը յիշեմ, որ հայրս զիս պարի կը տանէր: Երբ կը պարես, կրնաս պատկերացնել, որ կ’ապրիս Արեւմտեան Հայաստան: Մեծցած եմ հայկական մթնոլորտի մէջ եւ ծանօթացած հայկական ժառանգութեան: Մեծ հայրս զինուոր եղած է Հայերու ցեղասպանութեան ընթացքին եւ մեծ թիւով հայեր փրկած: Իմ վրաս ազդած է այդ ամէնը»,- կը յիշէ լուսանկարիչը