ՌԴ արտաքին գործոց նախարարութիւնն իր մտահոգութիւնը կը յայտնէ Լաչինի միջանցքի տարածքին եւ շփման գիծի այլ հատուածներու մէջ լարուածութեան աճին վերաբերեալ։ «Ռուս խաղաղապահները կը գործադրեն բոլոր ջանքերը՝ տարածքին մէջ իրավիճակը կայունացնելու համար։ Ռուսիոյ արտաքին գործոց նախարար Սերկէյ Լաւրով սերտ կապի մէջ է իր ատրպէյճանցի եւ հայ գործընկերներուն հետ։

Կոչ կ’ուղղենք կողմերուն ցուցաբերել զսպուածութիւն եւ պահպանել հրադադարի ռեժիմը։ Առկայ հակասութիւններու կարգաւորումը պէտք է իրականացուի բացառապէս քաղաքական եւ դիւանագիտական ​​ճանապարհով՝ հաշուի առնելով կողմերու դիրքորոշումները եւ խստօրէն պահպանելով 2020 թուականի Նոյեմբերի 9-ի Ռուսիոյ, Ատրպէյճանի եւ Հայաստանի ղեկավարներու յայտարարութեան դրոյթները:

Համոզուած ենք, որ կողմերու ջանքերը պէտք է կեդրոնացած ըլլան Պաքուի եւ Երեւանի միջեւ յարաբերութիւններու դրական օրակարգ ձեւաւորելուն՝ առկայ եռակողմ բանակցային ձեւաչափերու ծիրին մէջ»,- ըսուած է յայտարարութեան մէջ։

Յիշեցնենք, որ արդէն 3 օր է, որ ատրպէյճանական կողմը սկսած է սադրիչ գործողութիւնները արցախ-ատրպէյճանական սահմանային հատուածին, որուն հետեւանքով Արցախի բանակն ունի 2 զոհ եւ 15-է աւելի վիրաւորներ։

Leave a Reply