Արցախի Հանրապետութեան պետական նախարար Արտակ Բեգլարեան ֆէյսպուքեան իր էջին կատարած գրառման մէջ անդրադարձած է վերջին օրերուն ատրպէյճանական յարձակումներու հետեւանքով ստեղծուած իրավիճակին:

Պետնախարարին գրառումը կը ներկայացնենք ստորեւ. 

«Վերջին օրերու ատրպէյճանական յարձակումներու ընթացքին մեր զինծառայողները բազմիցս դիմակայած են ատրպէյճանական գրոհներն ու սադրանքները: Ցաւօք, հիմնականաբար անօդաչու սարքերու հարուածներէ ունեցած ենք 2 զոհ եւ 19 վիրաւոր: Իմ խորին ցաւակցութիւններս կը յայտնեմ Գուրգէն Գաբրիէլեանին եւ Արթուր Խաչատրեանին հարազատներուն, իսկ վիրաւորներուն կը մաղթեմ շուտափոյթ ապաքինում:

Այս դէպքերը հերթական անգամ ապացուցեցին, որ Արցախի ժողովուրդի դիմադրութեան ոգին կոտրուած չէ, եւ մենք պատրաստ ու ունակ ենք ինքնապաշտպանութեան։ 

Ատրպէյճան կը շարունակէ հայատեացութեան ու պատերազմի քաղաքականութիւնը՝ բացառելով հայ ազգի գոյութիւնն առնուազն Արցախի մէջ, իսկ ապագային՝ նաեւ Հայաստանի մէջ։ Միջազգային ռազմաքաղաքական երաշխիքներն ու մեխանիզմները, յատկապէս այս փխրուն աշխարհակարգի պայմաններուն մէջ, ամբողջութեամբ չեն ապահովեր Արցախի ժողովուրդի կայուն անվտանգութիւնը, եւ մենք ստիպուած ու պարտաւոր ենք շարունակաբար բարելաւել մեր ռազմավարական դիմադրողականութեան մակարդակը»։

Արեւմտեան Հայաստանը մշտապէս կանգնած է Արցախի կողքը եւ կոչ կ’ուղղէ ամուր մնալ իրենց բնիկ տարածքներուն մէջ ու պայքարիլ իրաւունքներու վերկանգնման համար: