«Ատրպէյճանի յուշարձաններու պաշտպանութեան հասարակական միաւորում» կազմակերպութիւնը յայտարարած է Բերձորի Սուրբ Համբարձման  եկեղեցին մզկիթի վերածելու մասին՝ հրապարակելով նաեւ նախագիծի լուսանկարը։

Արցախի Հանրապետութեան ԿԳՄՍ փոխնախարար Լեռնիկ Յովհաննիսեան Արցախի հանրային հեռուստակայանին հետ զրոյցի ժամանակ, մեկնաբանելով այդ հանգամանքը նշած է, որ թէեւ պաշտօնական որեւէ արձագանգ չկայ, բայց չի կարծեր, որ Ատրպէյճան իր մտադրութենէն կրնայ հրաժարիլ։

«Ատրպէյճան ամէն կերպ կը փորձէ աւերել ու պղծել հայկական յուշարձանները, իսկ որպէսզի Օգոստոսի 25-էն ետք նմանատիպ նոր տեսարաններու չհանդիպինք Բերձորի, Աղաւնոյի եւ Ներքին Սուսի մէջ, այս օրերուն կ’իրականացուին այդ բնակավայրերէն պատմամշակութային ժառանգութեան տարհանման աշխատանքներ»,- ըսած է Լ. Յովհաննիսեան։

 Արեւմտեան Հայաստանը կ’արձանագրէ այն բոլոր դէպքերը, երբ կը փորձեն նենգափոխել հայկական ճարտարապետութեան գոհարները՝ զանոնք վերածելով մզկիթներու կամ այլ կառոյցներու: Արեւմտեան Հայաստանի մէջ շատ են նմանատիպ դէպքերը, յատկապէս հայերու դէմ իրագործուած ցեղասպանութենէն ետք: