Ամերիկեան պարբերականը կը նշէ, որ այբուբէնը փոխած է հայերու աշխարհայեացքը եւ ազդած ազգի ամբողջ մշակոյթին վրայ։ Ամերիկեան «Atlas Obscura» առցանց ամսագիրը պատմած է հայոց այբուբէնի իւրայատկութեան եւ Մեսրոպ Մաշտոցի մասին: Բրիտանացի յայտնի գրող, հեռուստահաղորդավար եւ մաթեմաթիքոս Ալեքս Պելոս կը գրէ, որ Մաշտոցի գիւտը Հայաստանի պատմութեան թերեւս ամենակարեւոր իրադարձութիւնը եղած է։ «Երեւանէն ոչ հեռու, լերան լանջին կը խոյանան հայոց այբուբէնի 39 քարէ տառերը։ Ամէն երկիր չէ, որ կրնայ հպարտանալ նման շքեղութեամբ»,- նշուած է յօդուածին մէջ։

Իկոր Տորֆման Լազարեւ՝ Համպուրկի համալսարանի ձեռագիր մշակոյթներու ուսումնասիրութեան կեդրոնէն, նշած է.  «Հայերէնն այն սակաւաթիւ լեզուներէն է, որ «ողջ  մնացած է», առաջին հերթին՝ իր այբուբէնին շնորհիւ»։

Անոր խօսքով՝ այբուբէնը փոխած է մարդոց աշխարհայեացքը եւ ազդած ազգի ամբողջ մշակոյթին վրայ։ Ճիշդ անոր շնորհիւ է, որ հայերը կրցած են պահպանել իրենց ինքնութիւնը։ Մատենադարան. ձեռագիրները չեն այրիր, այլ սիրով եւ հոգատարութեամբ կը վերականգնուին

Սեփական գիրերու առկայութիւնը նպաստեց հայ ժողովուրդի համախմբման, որ այն ժամանակ բաժնուած էր Բիւզանդական եւ Պարսկական կայսրութիւններուն միջեւ։

Տորֆման-Լազարեւ յատկապէս կարեւոր կը համարէ այն փաստը, որ այբուբէնի ձայնահնչիւնային առանձնայատկութիւնը հայոց լեզուի կրողներուն թոյլ կու տար հեշտութեամբ տիրապետել անոր՝ ի տարբերութիւն այլ, աւելի բարդ լեզուներու կրողներուն: