Ճանապարհի նորակառոյց հատուածը սկիզբ կ’առնէ Ստեփանակերտ-Բերձոր մայրուղիի 36 քմ-էն՝ Բերդաձորի շրջանի Մեծ Շէն տանող խաչմերուկէն: 2021 թուականի Յուլիսէն այս հատուածի շինարարութիւնը սկսած է ատրպէյճանական կողմը, մէկ տարի անց յայտարարած աւարտին մասին: Աւելի քան 11 մեթր լայնութեամբ ու 21 քմ երկարութեամբ նորակառոյց ճանապարհը կը սկսի Մեծ Շէնով, կը հասնի դէպի Հին Շէն, այնուհետեւ կ’երկարի մինչեւ Աղանոյ գետին վրայ կառուցուած կամուրջը: Կամուրջի շինարարական աշխատանքները աւարտած են՝ կապելով գետի երկու ափերը: Հայկական կողմը շինարարութիւնն սկիզբ առած է օրեր առաջ: Նոր երթուղին պիտի հասնի մինչեւ Սիւնիքի մարզի Կոռնիձոր գիւղ, այնտեղէն՝ Տեղ գիւղ, այնուհետեւ պիտի միանայ Գորիս տանող մայրուղիին:  

Արցախի Անվտանգութեան խորհուրդի քարտուղար Վիտալի Բալասանեան նոր երթուղիով մեկնած եւ ծանօթացած է  նոր ճանապարհի շինարարական աշխատանքներուն: