Հայկանուշ Մառք (Հայկանուշ Թոփուզեան) ծնած է 1883 թուականի Փետրուարի 14-ին, Կ. Պոլիս՝ Մարգար եւ Եփրաքսէ Թոփուզեաններու ընտանիքին մէջ: Յաճախած է Այասպաշայի վարպետ-տուտու եւ «Սէոր» վարժարանները: 1898 թուականին աւարտած է Էսայեան միջնակարգ վարժարանը՝ աշակերտելով  Զապէլ Ասատուրին եւ դառնալով անոր արժանաւոր յետնորդը: Այնուհետեւ՝ կրթութիւնը շարունակած է անձնական դասերով: Անոր ուսուցիչն էր յայտնի մանկավարժ եւ գրաբարի գիտակ Յակոբ Գուրգէն: Միաժամանակ, որպէս ուսուցչուհի, պաշտօնավարած է Ազգային հիւանդանոցի գիշերօթիկ որբանոցին մէջ, այնուհետեւ՝ ութ տարի դասաւանդած է Նշանթաղի Նիկողոսեան աղջկանց բարձրագոյն վարժարանին մէջ: 

Հայկանուշ Մառքի հրապարակախօսութիւնը կ’ամփոփւէ կիներու ազատագրութեան հիմնախնդիրները։

Թղթակցած է նաեւ «Բիւրակն», «Հայաստանի կոչնակ», «Երիտասարդ հայուհի» պարբերականներուն: 1919 թուականին Կ. Պոլսոյ մէջ Մառք հիմնած է «Հայ կին» հանդէսը, որուն նպատակն էր՝ բարձրացնել հայ կնոջ դերը ազգային կեանքին մէջ, զարգացնել հայ կնոջ մտաւոր աշխարհը: «Հայ կին» հանդէսը թղթակիցներ ունէր նոյնիսկ Փարիզէն ու Միացեալ Նահանգներէն։ 

«Հայ կին» հանդէսը Մառքի խմբագրութեամբ լոյս կը տեսնէ մինչեւ 1932 թուական, ամիսը երկու անգամ: Այն հայալեզու կարեւոր հանդէսներէն մէկն էր, որ կը տպագրուէր Ցեղասպանութենէն ետք։