Արցախի նախագահ Արայիկ Յարութիւնեան այցելած է Մարտունի շրջանի Ճարտար քաղաքը եւ ծանօթացած բարերար Վլատիմիր Աւագեանի միջոցներով կառուցուած բազմանպատակային մարզական համալիրի պայմաններուն:

Երկրի ղեկավարը կարեւորած է համայնքներուն մէջ մարզական նման կառոյցներու առկայութիւնը, նշած, որ պետութիւնը պատրաստ է աջակցիլ նոր մարզադահլիճներու կառուցման։ Նախագահ Յարութիւնեան նաեւ հանդիպած է համայնքի ղեկավարին եւ աւագանիի անդամներուն հետ, քննարկած առկայ խնդիրները:

Բարձրացուած հիմնախնդիրներէն Արայիկ Յարութիւնեան առանձնացուցած է խմելու եւ ոռոգման ջուրի հարցի հրատապ լուծման անհրաժեշտութիւնը, նշած, որ երկու տարուան ընթացքին հանգրուան առ հանգրուան ծրագիրն ամբողջութեամբ պիտի իրագործուի:

Անդրադառնալով Հանրապետութեան մէջ ռազմաքաղաքական վերջին զարգացումներուն՝ ան նշած է, անոնք գլխաւորաբար պայմանաւորուած են աշխարհաքաղաքական իրավիճակով, եւ ոչ ոքի համար գաղտնիք է, որ պարբերաբար հրահրուող սադրիչ գործողութիւններն ուղղուած են Արցախը հայաթափելուն՝ արժեզրկելով ինչպէս եռակողմ յայտարարութեամբ հաստատուած խաղաղութիւնը, այնպէս ալ ռուսական խաղաղապահ զօրակազմի առաքելութիւնը: Նախագահին խօսքով՝ պէտք է զինուիլ ամուր համբերութեամբ եւ չշեղիլ Արցախի անկախութեան ուղիէն, իսկ իշխանութիւնները պիտի շարունակեն գործադրել բոլոր հնարաւոր ջանքերը առկայ անվտանգային խնդիրներու լուծման, բարեկեցիկ կեանքի համար անհրաժեշտ կենսապայմաններու ապահովման եւ կայուն ապագայի երաշխաւորման ուղղութեամբ:

Արեւմտեան Հայաստանը իր զօրակցութիւնը կը յայտնէ Արցախ ապրող բնակչութեան, յոյս  յայտնելով, որ այս դժուարին դրութիւնը շուտափոյթ լուծում կը ստանայ, չվնասելով բնիկ ժողովուրդի շահերը: