Քռասնի համայնքի վարչական տարածքին Ասկերան շրջանին մէջ Ատրպէյճանի կողմէ բռնազաւթուած Ակնաղբիւր գիւղէն տեղահանուած ընտանիքներուն համար կը կառուցուի նոր բնակավայր, որուն շինարարութիւնը կ’ընթանայ բնականոն հունով:

Այս մասին «Արցախփրէս»ի թղթակիցին հետ զրոյցի ժամանակ ըսած է Արցախի Հանրապետութեան Տարածքային կառավարման եւ ենթակառուցուածքներու նախարարի առաջին տեղակալ Վարդան Բեգլարեան:

«Կը կառուցուի 12 եռայարկ շէնք՝ 18-ական բնակարանով: Շինարարական աշխատանքները սկսած են 2021 թուականի Նոյեմբերէն: Նախատեսուած է, որ աշխատանքներու մէկ մասը աւարտի մինչեւ տարեվերջ, միւս մասը՝ 2023 թուականի գարնան»,- տեղեկացուցած է Վ. Բեգլարեան: 

«Կառուցուող 216 բնակարաններէն 100-ը նախատեսուած է տեղահանուած ակնաղբիւրցիները ամբողջութեամբ բնակարանով ապահովելու համար, իսկ միւսներուն մէջ պիտի բնակին աւելի փոքր համայնքներէ տեղահանուած այն բնակիչները, որոնց համար առանձին թաղամաս չի կառուցուիր»,- ընդհանրացուցած է նախարարի առաջին տեղակալը:

Արեւմտեան Հայաստանը դրական կը գնահատէ բռնազաւթուած տարածքներէն տեղահանուած բնակաչութեան տեղակայումը Արցախի տարբեր շրջաններուն մէջ, քանի որ կարեւոր է Արցախի բնիկներու՝ այդ տարածքին մէջ բնակիլը։