Իրան պատրաստ է տարածաշրջանի այլ երկիրներուն հետ միասին բաւարարելու տարածաշրջանի դէպի ծով ելք չունեցող 8 երկիրներու տարանցիկ կարիքները։ Այս մասին յայտարարած է Իրանի ճանապարհներու եւ քաղաքաշինութեան նախարար Ռոստամ Ղամեմի՝ Թուրքմէնիստանի մէջ դէպի ծով ելք չունեցող զարգացող երկիրներու երթեւեկութեան ատենաժողովի ժամանակ, կը փոխանցէ «ԻՌՆԱ»։

«Աշխարհի 32 զարգացող երկիրներու քառորդը, որոնք ելք չունին դէպի ծով, այսինքն՝ 8 երկիրներ, այդ թուին՝ Աֆղանիստանը, Հայաստանը, Ատրպէյճանը, Ղազախիստանը, Ղրղըզիստանը, Տաճիկիստանը, Թուրքմէնիստանը եւ Ուզպէքիստանը, ունին սերտ երկկողմ եւ բազմակողմ տարանցիկ փոխգործակցութիւն Իրանի հետ»,- նշած է ան։

Անոր խօսքով, այդ մէկը կը նշանակէ, որ Իրան եւ տարածաշրջանի այլ երկիրներ իրենց վրայ վերցուցած են միջազգային հանրութեան պարտաւորութիւններու մէկ մասը՝ դէպի ծով ելք չունեցող երկիրներու խոցելիութիւնը նուազեցնելու համար, եւ կ’օգնեն անոնց կրճատել առեւտուրի ծախսերն ու հեշտացնել մուտքը դէպի համաշխարհային շուկայ:

 Արեւմտեան Հայաստանը բարեկամական Իրանի այս քայլերը դրական կը գնահատէ, յատկապէս այս դժուարին պայմաններուն, որուն մէջ յայտնուած է Հայաստանի Հանրապետութիւնը։