Ատրպէյճանական իշխանամէտ լրատուամիջոցները, վկայակոչելով իրենց դիւանագիտական աղբիւրները, հաստատած են յոյն լրագրող Փօլ Անտոնոպուլոսի հրապարակած տեղեկութիւնն այն մասին, որ Հնդկաստան միանձնեայ արգելափակած է Ատրպէյճանի մասնակցութիւնը «BRICS»ի (հինգ երկիրներու խումբ, որոնց անդամ են Պրազիլը, Ռուսիան, Հնդկաստանը, Չինաստանը եւ Հարաւ Ափրիկեան Հանրապետութիւնը) յառաջիկայ գագաթնաժողովին՝ որպէս հիւր։ Նշենք սակայն, որ այս առաջին դէպքը չէ, երբ Հնդկաստան հրաժարած է աջակցիլ Ատրպէյճանին։ Այսպիսով, Պաքու Հնդկաստանը կը մեղադրէ Լոնտոնի մէջ Ատրպէյճանի դեսպանատան վրայ յարձակման հետ կապուած Չմիաւորման շարժման հռչակագիրը խափանելու մէջ։ Նշենք, որ  «Չմիաւորման շարժումը» ստեղծուած է 1961թ.` ռազմական գործողութիւններուն չմասնակցելու սկզբունքով. այս պահուն անոր անդամ է 120 պետութիւն:

Հնդկաստանի պատուիրակութեան աջակցած է նաեւ Պութանը։ Յստակ յայտնի չէ, թէ ինչու Հնդկաստան նման կտրուկ դիրքորոշում որդեգրած է Ատրպէյճանի նկատմամբ, սակայն կարելի է ենթադրել, որ պատճառը Պաքուի եւ Փաքիստանի միջեւ զարգացող դաշնակցային յարաբերութիւններն են, մասնաւորապէս՝ ռազմական ոլորտին մէջ, բան մը, որ չի կրնար չառաջացնել Նիւ Տելհիի անհանգստութիւնը։ 

Արեւմտեան Հայաստանը դրական կը գնահատէ Հնդկաստանի այս կշռադատուած քայլը, քանի որ միջազգային հանրութիւնը եւ առանձին պետութիւններ պէտք է որոշ հարցերու մէջ զսպող մեխանիզմներ կիրառեն, որոնցմէ մէկն ալ  նմանօրինակ գագաթնաժողովին որպէս հիւր մասնակցութեան հնարաւորութիւն չունենալն է։