Ասկերանի շրջանի Այգեստան համայնքին մէջ Աւետարանոց գիւղէն բռնատեղահանուած ընտանիքներուն համար նոր բնակավայր կը կառուցուի, որ ըստ նախագիծի՝ բաղկացած է 254 առանձնատունէ: Այս մասին ըսած է շինարարական աշխատանքներն իրականացնող «Կապաւոր» ՍՊ ընկերութեան տեղամասի պետ Նայիրի Սարգսեան: «Ըստ նախագիծին՝ պիտի կառուցուի 254 առանձնատուն, որոնք պիտի ըլլան 2-5 սենեականոց: Կան արդէն կառուցուած տուներ, որոնց մէջ շուտով պիտի մեկնարկէ ներքին յարդարումը: Այս պահի դրութեամբ՝ 29 առանձնատան կառուցման համար հողային մեծածաւալ աշխատանք իրականացուած է»,- աւելցուցած է ան՝ մանրամասնելով, որ Աւետարանոցէն տեղահանուածներուն համար նախատեսուած նոր բնակավայրը պիտի ունենայ դպրոց, մանկապարտէզ, համայնքապետարան, բժշկական կէտ, մեծ խաղահրապարակ եւ եկեղեցի: Տեղամասի պետին հաւաստմամբ՝ կառուցուող բնակավայրը պիտի համապատասխանէ ժամանակակից չափանիշներուն: 

Արեւմտեան Հայաստանը դրական կը գնահատէ Արցախի  մէջ ընթացող այս տնաշինական աշխատանքները, քանի որ կարեւոր է հայուն՝ իր բնիկ հողին վրայ ապրելու եւ արարելու հանգամանքը։ Հայը պէտք է ապրի իր բնիկ հողին վրայ, անկախ թշնամական պետութիւններու վերաբերմունքէն կամ սադրանքներէն։