Ցեղասպանութեան կանխարգելման Լեմկինի հաստատութիւնը Ցեղասպանութեան Կարմիր` ամենաբարձր նախազգուշացումը հրապարակած է Ատրպէյճանին համար` նշելով, որ կը դատապարտեն շարունակուող ատելութեան խօսքը, սպառնալիքները եւ վայրագութիւնները Արցախի մէջ ու անոր սահմաններէն դուրս՝ հայ ժողովուրդին ու մշակութային ժառանգութեան նկատմամբ։

«Վերջերս ատրպէյճանական ընկերային կայքերու վրայ տարածուած տեսանիւթին մէջ կ’երեւի, թէ ինչպէս ատրպէյճանցի զինուորը մօտակայ հայկական գերեզմանոցէն փորուած հայկական գանգը կը կապէ զինուորական բեռնատարին ետեւի մասը, իսկ ծառայակիցները կ’ուրախանան: Այս նոր ակնյայտ վայրագութեան հետեւանքով Լեմկինի Ցեղասպանութեան կանխարգելման հաստատութիւնը կրկին կարմիր դրօշով ահազանգ կը հրապարակէ Ատրպէյճանին համար՝ նախազգուշացնելով հայերուն սպառնացող ցեղասպանութեան մասին:

Միջազգային հանրութիւնը, յատկապէս ՆԱԹՕ-ն եւ անոր անդամ երկիրները, կը շարունակեն անտեսել Ատրպէյճանի ցեղասպան յայտարարութիւնները եւ գործողութիւնները, որոնք բոլորն ալ աջակցութիւն կը ստանան եւ առաջ կը մղուին Թուրքիոյ կողմէ:

Մենք կոչ կ’ուղղենք բոլոր միջազգային եւ պետական ​​մարմիններուն վերահսկելու Թուրքիոյ եւ Ատրպէյճանին ցեղասպան գաղափարախօսութիւնն ու գործելակերպը, ճնշում գործադրելու Թուրքիոյ եւ Ատրպէյճանի նկատմամբ՝ դադրեցնելու համար հայ ժողովուրդին դէմ ուղղուած ցեղասպանական սպառնալիքները եւ ամրապնդելու հայերու եւ հայկական ինքնութեան անվտանգութիւնը Հայաստանի, Արցախի եւ Սփիւռքի համայնքներուն մէջ»,- ըսուած է յայտարարութեան մէջ։

Արեւմտեան Հայաստանը հետեւողական է նմանատիպ յայտարարութիւններու հնարաւոր հանգուցալուծումներուն եւ աշխատանքներ կը տանի միջազգային հանրութեան շրջանին մէջ նմանատիպ դէպքերու աւելի լայն լուսաբանման եւ խոր վերլուծութեան համար։ Այն ինչ տեղի կ’ունենայ այժմ Արցախի բնիկ տարածքներուն մէջ, որոնք 2020 թուականին բռնազաւթուեցան Ատրպէյճանի կողմէ, գրեթէ նոյնը տասնեակ տարիներ շարունակ տեղի  կ’ունենայ Արեհւմտեան Հայաստանի տարածքին։ Թուրքերը եղեռնը կը շարունակեն արդէն մշակութային առումով, չյարգելով որեւէ սրբութիւն։