Համաշխարհային դրամատան «Տեղական տնտեսութիւն եւ ենթակառուցուածքներու զարգացում» ծրագիրով շուտով պիտի մեկնարկեն Դաշտադէմ ամրոցի բարեկարգման աշխատանքները։ Այս մասին կը յայտնէ Համաշխարհային դրամատան հայաստանեան գրասենեակը։

Նախատեսուած է ամրոցի ողջ տեղանքի ուսումնասիրութիւն եւ ընտրուած հատուածներու մէջ պեղումներու իրականացում, պատմահնագիտական արգելոց-թանգարան տանող ճանապարհի բարեկարգում, հեծանիւներու ուղիի գծանշում եւ ամրոցի շրջագիծէն դուրս՝ յարակից տարածքներու բարեկարգում։

Դաշտադէմի ամրոցը կամ Քաղէնի ամրոցը կը գտնուի Արագածոտն մարզի Դաշտադէմ գիւղին մէջ: Կ’ենթադրուի, որ այն կառուցուած է ուրարտական ամրոցի տեղը՝ Կամսարականներու օրօք։ Անոր մասին յիշատակութիւն կայ արաբներու Հայաստան կատարած արշաւանքներու առաջին շրջանին (7-րդ դար) Ղեւոնդ պատմիչի աշխատութեան մէջ։ Ամրոցին շուրջը յետագային կիսաշրջանաձեւ աշտարակներով պարիսպներ կառուցուած են, որոնց հետքերն այժմ պահպանուած են։ Գլխաւոր մուտքը կիսաշրջանաձեւ բուրգէ է։ Քաղէնի ամրոցն ունի ստորերկրեայ գաղտնուղի՝ շարուած պազալտէ սալերէ: