ՀՀ արուեստի վաստակաւոր գործիչ, «Կարին» աւանդական երգի-պարի խումբի գեղարուեստական ղեկավար Գագիկ Գինոսեան  ըսած է. «Ազգային տեսանկիւնէ Բերձորի հայաթափումը միանշանակ անընդունելի է։ 2020 թուականի Նոյեմբերին արձանագրուեցաւ, որ մենք պարտուած ենք, բան մը, որուն ես չեմ հաւատար, որովհետեւ ոչ միայն գերտերութիւններու, այլ նաեւ ներքին տականքի ակնյայտ համագործակցութիւն կար՝ ազգի արժանապատիւ տեսակին ծունկի բերելու նպատակով։ Ես կը կարծեմ, որ ուղղակի պարտիզանական կռուի ժամանակն է։ Եւ այդ կռիւը միայն զէնքը ձեռքին կռիւ չէ, այլ նաեւ գաղափարական կռիւ է, ոգիի, կրթութեան, մշակոյթի կռիւ է, որպէսզի կարողանանք ազգը համախմբել ինչ-որ գաղափարի շուրջ։ Պէտք է ազգը նախապատրաստենք ինքն իր կողմը կանգնելուն ինքնաճանաչման եզրին գալու, ազգային արժանապատւութիւնը պահելուն կողմ ըլլալու։ Մենք պէտք է կատարենք նախ առաջին քայլը, այն ազգի ոգին բարձրացնելն է՝ ի հեճուկս պարտուողական, ազգադաւ, հակապետական իշխանութիւններու եւ անձերու։ Այն, որ  ազգային ոգին կը կոտրուի, ազգային արժանապատւութիւնը կ’ոտնահարուի, արդն իսկ ազգադաւութիւն է»։

Արեւմտեան Հայաստանը ոչ մէկ պարագայի կ’ընդունի հայկական բնիկ տարածքներու զիջումը զաւթիչ Ատրպէյճանին, եւ այդ առումով աշխատանքներ կը տարուին  բնիկ ժողովուրդներու՝ իրենց բնիկ տարածքներուն մէջ ապրելուն համար։