Հայաստանի Հանրապետութեան կողմէ Արցախի Հանրապետութեան շարք մը բնակավայրերու քաղաքացիական բնակչութեան իրաւունքներու պաշտպանութեան համար Մարդու իրաւունքներու եւրոպական դատարան ներկայացուած միջանկեալ միջոց կիրառելու մասին պահանջին հիման վրայ սոյն թուականի Օգոստոսի 19-ին Մարդու իրաւունքներու եւրոպական դատարանը վերահաստատած է 2020 թուականի Սեպտեմբերի 29-ին կիրառուած եւ նոյն թուականի Նոյեմբերի 3-ին առաւել ընդլայնած միջանկեալ միջոցը՝ նշելով, որ այն կը շարունակէ ուժի մէջ մնալ:

Այս մասին կը յայտնէ Միջազգային իրաւական հարցերով ՀՀ ներկայացուցիչի գրասենեակը։

«Մարդու իրաւունքներու եւրոպական դատարանը կողմերը հրաւիրած է ձեռնպահ մնալու այնպիսի գործողութիւններէ, որոնք կրնան յանգեցնել քաղաքացիական բնակչութեան համաձայնագիրներով պաշտպանուող իրաւունքներու խախտման, այդ թուին անոնց՝ Համաձայնագիրի 2-րդ, 3-րդ եւ 8-րդ յօդուածներով պաշտպանուող իրաւունքները վտանգի տակ դնելէ»,-  նշուած է յայտարարութեան մէջ:

Մարդու իրաւունքներու եւրոպական դատարանը նաեւ արձանագրած է, որ ՀՀ կառավարութեան վկայակոչած իրադարձութիւններուն, այն է՝ խաղաղ բնակավայրերու ուղղութեամբ իրականացուող զինուած յարձակումներ, Բերձոր եւ Աղաւնոյ համայնքներու բնակչութեան տեղահանման սպառնալիքներ, անոնց նկատմամբ կիրառելի է 2020 թուականի Սեպտեմբերի 29-ին կայացուած եւ մինչեւ օրս ուժի մէջ գտնուող որոշումը:

Յիշեցնենք, որ Արւմտեան Հայաստանի ազգային խորհուրդի նախագահ Արմենակ Աբրահամեանի ջանքերով, շուշեցի փախստականներու հայցադիմումը եւս  վերջերս ընդունուեցաւ Մարդու իրաւունքներու եւրոպական դատարանին կողմէ, եւ պիտի ստանայ համապատասխան ընթացք։ Սակայն կարեւոր կը համարենք նշել, որ այն չի վերաբերիր միայն գոյքային կորուստին, այն ամբողջական փաթէթ է, որուն մէջ ներկայացուած են անոնց խախտուած իրաւունքները։