Եթե ​​Ատրպէյճան ինքզինք կը համարէ 1918-1920 թուականներու Ատրպէյճանի Հանրապետութեան իրաւայաջորդը եւ չի ճանչնար Արցախի Հանրապետութեան Խորհրդային միութեան կողմէ որոշուած սահմանները, ուրեմն կրնանք յիշել, որ Նախիջեւանը Ատրպէյճանին փոխանցուած է Խորհրդային միութեան օրերուն, որուն համար ալ այն պէտք է վերադարձնեն հայերուն։ Այս մասին «NEWS.am»ի թղթակիցին հետ զրոյցի ժամանակ ըսած է յայտնի քարտէզագիր Ռուբէն Գալչեան։

Ան յիշած է, որ 1918-1936 թուականներուն Հայաստանի մէջ ներերկրային սահմաններ չեն եղած, անոնք ստեղծուած են Խորհրդային միութեան կողմէ։

«Այդ մէկը կը նշանակէ, որ ատրպէյճանցիները այլեւս պէտք չէ խօսին, այդ թուին նաեւ Ալիչի մասին, որ նոյնպէս Խորհրդային միութիւնը յանձնած է իրենց։ Այն ամէնը, որ փոխանցուած է խորհրդային իշխանութիւններուն կողմէ, պէտք է վերադարձուի հայերուն»,- ըսած է Գալչեան։ Փորձագէտը եւս մէկ անգամ յիշել  տուած է, որ Հայաստանի եւ Ատրպէյճանի միջեւ սահմանի մասին փաստաթուղթը վաւերացուած է  1969 թուականին՝ Խորհրդային միութեան զինուած ուժերու գլխաւոր շտաբի քարտէզներու հիման վրայ։ «Ատրպէյճանցիներն այս սահմանէն լրջօրէն առաջ շարժած են դէպի Հայաստանի խորքերը՝ Սեւլիճայի, Շրոջայի, Դաւիթ Բէկի հատուածներուն մէջ։ Քանի դեռ անոնք դուրս չեն բերած իրենց զօրքերը սահմանային գիծէն այն կողմ, այն փաստաթուղթը, որով Ատրպէյճան ինք վաւերացուցած է, մենք պէտք չէ սկսինք սահմանազատման  գործընթաց»,- ընդգծած է ան։

Արեւմտեան Հայաստանը առաջնորդուելով Սեւրի Դաշնագիրի իրաւարար վճիռով, եւս պահանջ կը ներկայացնէ ոչ միայն զաւթիչ Ատրպէյճանին եւ Թուրքիոյ, այլեւ միջազգային հանրութեան, որպէսզի ըստ ստանձնուած պարտաւորութիւններու, իրականացուին պարտաւորութիւնները եւ ազատագրուին հայկական այն տարածքները, որոնք բռնազաւթուած կամ բռնակցուած են թշնամական երկիրներուն, այսպիսով զրկելով հայերը իրենց բնիկ տարածքներուն մէջ ապրելու եւ արարելու իրաւունքէն։