Հայաստան-Արցախ նոր ճանապարհի ձեւաւորման հետեւանքով ատրպէյճանական վերահսկողութեան տակ գտնուող որոշ տարածքներ պիտի անցնին ռուսական հսկողութեան տակ, որովհետեւ նոր ճանապարհը եւս պիտի գտնուի ռուսական խաղաղապահ առաքելութեան վերահսկողութեան ներքոյ։ Այդ լուրը Արցախի նախագահի աշխատակազմը հաստատած է «Հետք»ի հարցման ի պատասխան։

Ըստ 2020 թուականի Նոյեմբերեան եռակողմ յայտարարութեան 6-րդ կէտին, Լաչինի ճանապարհը (5 քմ լայնութեամբ), որ պիտի ապահովէ Արցախի կապը Հայաստանի հետ, կը մնայ Ռուսիոյ Դաշնութեան խաղաղապահ զօրակազմի վերահսկողութեան տակ»։ Արցախի նախագահականին փոխանցմամբ, Լաչինի նոր ճանապարհը պիտի  անցնի Քաշաթաղի եւ Շուշիի շրջաններով։ «Քաշաթաղի շրջանին մէջ ճանապարհի հատուածը կ’ընդգրկէ Մարաթուկ, Մելիքահող, Յունանաւան ու Մեղուաձոր բնակավայրերու եւ բնակատեղիներու տարածքը, Շուշիի շրջանին մէջ ճանապարհը կ’անցնի Հին շէն եւ Մեծ շէն համայնքներով եւ Տասը Վերստ գիւղի տարածքին կը միանայ Գորիս-Ստեփանակերտ գործող մայրուղիին»։