Տերսիմի աշխարհագրութիւնը, որ վայրի բնութեան եւ բուսատեսակներու առումով ամէնէն հարուստ շրջաններէն է, կանգնած է բնապահպանական ոչնչացման առաջ։ 2019 թուականին Տերսիմի մէջ 43,500 հա տարածքի վրայ հանքարդիւնաբերութեան գործունէութիւն իրականացնելու արտօնագիր յատկացուած է։ Թէեւ անոնց մէկ մասը չեղարկուած է բնապահպաններու պայքարի արդիւնքով, սակայն սպառնալիքը դեռ կը շարունակուի։

Փաստաբան Պարըշ Եըլտըրըմ, որ տարիներ շարունակ դատական ​​հայցերով կը պայքարի ամբարտակներու եւ հիտրօ-ելեկտրակայաններու դէմ, յայտարարած է, որ Մնձուրի աւազանին մէջ 43,080,87 հա տարածքի վրայ ոսկիի, պղինձի եւ արծաթի արդիւնահանման նախագիծեր կ’իրականացուին։

Փաստաբանը, ուշադրութիւն հրաւիրելով Եփրատի աւազանին մէջ գտնուող Տերսիմի եւ Բիւրակնի բնապահպանական համակարգը ոչնչացնող հանքարդիւնաբերական նախագիծերու վրայ, ըսած է. «Մաքուր ջրային աղբիւրները կը սպառին։ Բնապահպանութեան համար պայքարը կեանքի իրաւունքի համար պայքար է։ Այն պէտք չէ ընկալուի միայն որպէս տարածաշրջանային պայքար»։ Անոր խօսքով՝ Տերսիմ բազմաթիւ բնապահպանական համակարգերու բնօրրան է, յատկապէս Մնձուրի աւազանը: Տարածաշրջանին մէջ  մօտ 2000 բուսատեսակ կայ, որոնց 20 տոկոսը տեղայատուկ է։ Այստեղ կը բնակին նաեւ վայրի լեռնային այծեր, գորշ արջեր, գայլեր, լուսաններ, եւ  նոյնիսկ՝ անհետացման եզրին գտնուող Արեւմտեան Հայաստանի ընձառիւծը։

Արեւմտեան Հայաստանը ցաւով կ’արձանագրէ մեր բնիկ տարածքներուն մէջ բնապահպանական նման ծաւալի վնասի մասին։ Տերսիմի տարածաշրջանը շատ կարեւոր դեր ու նշանակութիւն ունի Արեւմտեան Հայաստանի տնտեսութեան զարգացման գործին եւ մեր հիմնական զբօսաշրջային ուղղութիւններէն մէկն է, եւ պէտք չէ թոյլ տալ, որ բռնազաւթիչները ոչնչացնեն տեղի բնութիւնը։ Այս հարցերով Արեւմտեան Հայաստանը համապատասխան քայլեր պիտի ձեռնարկէ։