Մենեմէնի քաղաքապետարանը Իզմիրի Զաֆէր թաղամասին մէջ տարիներ շարունակ անգործութեան մատնուած Սուրբ Սարգիս եկեղեցին պիտի վերականգնէ որպէս թանգարան, գիտական եւ արուեստի կեդրոն։ Եկեղեցւոյ տարածքը յանձնուած է կապալառու ընկերութեան, որուն համար անցեալ տարուայ Յուլիսին մրցոյթ կազմակերպուած էր։  Սուրբ Սարգիս եկեղեցին, որուն կառուցման տարեթիւը չգտնուած արձանագրութեան պատճառով հնարաւոր չէ եղած որոշել, ենթադրաբար կառուցուած է 19-րդ դարուն։

Սուրբ Սարգիս եկեղեցին ծառայած է հայերուն մինչեւ 1922 թուականը։ Այն երկար տարիներ մնացած էր աւերակ՝ անտարբերութեան պատճառով։ Պատերը ներսէն եւ դուրսէն վնասուած էին, առաջացած էին ճաքեր։ Անհրաժեշտ արտօնութիւններէ ետք մրցոյթը կայացած է, եւ շուտով եկեղեցին պիտի վերակառուցուի։

Արեւմտեան Հայաստանը յոյս կը յայտնէ, որ այս իրական վերանորոգում պիտի ըլլայ, ոչ թէ հերթական թրքական կեղծ քարոզչութիւնը, որով պիտի մաքրեն եկեղեցւոյ հայկական գրութիւնները կամ փոխեն անոր օգտագործման բնոյթը։ Արեւմտեան Հայաստանը համակ ուշադրութեամբ պիտի  հետեւի վերանորոգման աշխտանանքերուն եւ արձանագրէ որեւէ խախտում, որ թոյլ պիտի տայ թրքական կողմը։