Օգոստոսի 23-ին ատրպէյճանական լրատուամիջոցները տեղեկութիւններ հրապարակած են՝ Ատրպէյճանի «Բարւոքում եւ ջրային տնտեսութիւն» ընկերութեան աշխատակիցներուն կողմէ Արցախի Հանրապետութեան ներկայացուցիչներու մասնակցութեամբ Սարսանգի ջրամբար կատարած այցին մասին:

Այդ կապակցութեամբ Արցախի տեղեկատուական շտաբէն կ’իրազեկեն, որ 2020թ. 44-օրեայ պատերազմէն ետք ստեղծուած իրավիճակի պայմաններուն մէջ ջրային աղբիւրներու կառավարման եւ հանրութեան մատակարարուող խմելու եւ ոռոգման ջուրերու անվտանգութեան ապահովման նպատակով Արցախի մէջ տեղակայուած ռուսական խաղաղապահ զօրակազմին միջնորդութեամբ Արցախի Հանրապետութեան ջրային կոմիտէի ներկայացուցիչները տակաւին 2021 թուականէն կը հաղորդակցին ատրպէյճանական կողմին հետ եւ պարբերական այցեր կը կատարեն Ատրպէյճանի վերահսկողութեան տակ գտնուող հատուածներ՝ խմելու եւ ոռոգման ջուրերու օգտագործման շուրջ փոխադարձ պայմանաւորուածութիւններ ձեռք բերելու եւ խնդիրներու կարգաւորման համար:

Այդ ծիրին մէջ հերթական հանդիպումը կազմակերպուած էր Սարսանգի ջրամբարին մօտ՝ Սարսանգի ջուրերու փոխշահաւէտ օգտագործման հարցի քննարկման նպատակով: Տեղւոյն վրայ միտքեր փոխանակուած են ջրային աղբիւրներու պատշաճ օգտագործման հնարաւոր տարբերակներու շուրջ՝ հաշուի առնելով Սարսանգի ջրամբարին հանդէպ Արցախի Հանրապետութեան վերահսկողութիւնը: