Թրքական «Timetürk» լրատուական կայքը հայկական մշակոյթին եւ մասնաւորապէս գինեգործութեան վերաբերեալ ուշագրաւ յօդուած հրապարակած է։ Նախ պատմական ակնարկով տեղեկութիւններ կը յայտնէ աւելի քան 5 հազար տարի առաջ հայ ժողովուրդի ձեւաւորման մասին։ Կը նշուի, որ շումերական գրաւոր աղբիւրներուն, Աստուածաշունչին մէջ կը յիշատակուի Արատտա անունով հնագոյն պետութեան մասին:

Այնուհետեւ թրքական աղբիւրը յղում կը կատարէ բրիտանական «The Telegraph» պարբերականին, ուր անդրադարձ  կատարուած է հայկական գինեգործութեան։

«Հայերը գինեգործութեամբ զբաղող ամենահին ազգն են աշխարհի մէջ։ Որպէս ապացոյց բրիտանական թերթը կը նշէ, որ «Արենի 1» քարանձաւային համալիրին մէջ յայտնաբերուած են 6000 տարուայ վաղեմութեան գինեգործութեան հետքեր։ Թերթը նաեւ կը յիշեցնէ, որ հայերը քրիստոնէութիւնը որպէս պաշտօնական կրոնք ընդունած առաջին ազգն են»։

Աղբիւրը նշած է նաեւ, որ Հայկական կոնեակը համտեսած անձերու թուին է Մեծ Բրիտանիոյ նախկին վարչապետ Ուինսթըն Չերչիլ։ Նոյնիսկ վարկած կայ, որ Եալթայի համաժողովի արդիւնքները  մեծ չափով պայմանաւորուած են հայկական կոնեակի եւ գինիի ազդեցութեամբ։ Ասոր կ’անդրադառնայ «The Telegram»ը եւ կը գրէ․ «Չերչիլ, Ստալին եւ ԱՄՆ նախագահ Ֆրանգլին Ռուզվելտ պատերազմէն ետք Եւրոպայի զարգացման ուղիները քննարկելու նպատակով հանդիպեցան Ղրիմի մէջ։ Եալթայի համաժողովի դրական արդիւնքն ապահովուեցաւ հայկական կոնեակին եւ գինիին շնորհիւ»։