Մենք ահաբեկիչներու հետ փոխըմբռնման պիտի չձգտինք, եւ միայն մեր յաղթանակը պիտի ըլլայ պատերազմի աւարտը, Ուքրանիոյ Անկախութեան օրուան առթիւ իր շնորհաւորական խօսքին մէջ ըսած է նախագահ Վլատիմիր Զելենսկի։ Ան նշած է, որ ուքրանացիները միաւորուած են, եւ կայ նոր ազգ, որ յայտնուած է Փետրուարի 24-ին, առաւօտեան ժամը 4-ին։ Ոչ թէ ծնած, այլ վերածնած, ընդգծած է նախագահը։ «Այն ազգը, որ չլացաւ, չվախցաւ, չփախաւ, չյանձնուեցաւ»։ Ան ըսած է, որ ոչ մէ բանակցութիւն տեղի պիտի ունենայ Ռուսիոյ հետ, մինչեւ  որ ան զօրքերը դուրս բերէ Ուքրանիոյ տարածքէն։

Ռուսիա Ուքրանիոյ դէմ կ’իրականացնէ նոյնը, ինչ որ կ’իրականացնէր ու կ’իրականացնէ Հայաստանի դէմ՝ անկախ պետականութեան վերացում։ Ուքրանիոյ դէմ պարզապէս կը գործէ ուղիղ, իր դէմքով, Հայաստանի դէմ՝ թուրքերու թիկունքով քօղարկուած։ Թէեւ, Օգոստոսի իրադարձութիւններէն եւ Փութին-Էրտողան հանդիպւոմէն ետք Ռուսիա յայտնուեցաւ Հայաստանի հետ ուղիղ առճակատման դիրքի վրայ, եւ այդ մէկը անխուսափելի էր։ Հայ ժողովուրդը նոյնպէս չփախաւ եւ հերոսաբար 44 օր դիմակայեց ռուս-թրքական թշնամանքը։ Հայ զինուորը ջարդեց Պաքուի ռազմական ողնաշարը, պատճառելով 20-25 հազար կորուստ, եւ հիմա կը պարզուին շատ հանգամանքներ, որ Նոյեմբերի 9-ի նախօրէին Պաքու արդէն ի վիճակի չէր շարունակել լայնածաւալ յարձակումը։

Այստեղ կը սկսի տարբերութիւնը․ Ուքրանիոյ մէջ նախ եւ առաջ չփախաւ քաղաքական ղեկավարութիւնը, հակառակ բոլոր առաջարկներուն։ Քաղաքական դաշտը եւ զանգուածային լրատուամիջոցները նոյնպէս չփախան եւ լծուեցան Ուքրանիոյ պաշտպանութեան գործին, բան մը, որ կտրուկ փոխեց իրավիճակը եւ Ուքրանիոյ դաշնակիցներուն պարտադրեց համարժէք գործողութիւններ։ Հայաստանի քաղաքական ղեկավարութիւնը յանձնուեցաւ, ստորագրեց ռուսերու պարտադրած թուղթը եւ կը կատարէ ռուս-թրքական համաձայնութիւնները՝ բացառելով հայկական խնդիրներու քննարկումը միջազգային օրինական կառոյցներու մէջ։ Հայկական քաղաքական դաշտի գերակշիռ՝ ռուսանպաստ «ընդդիմութիւնը» հաւատարմութիւն յայտնեց այդ թուղթին եւ իր քարոզչական ահռելի միջոցներով լծուեցաւ Հայաստանի պետականութեան կազմալուծման ռուս-թրքական ծրագիրներուն, ռուսերու ուսերէն պատասխանատւութիւնը հանելու առաջադրանքով։ Ռուսական գործակալութիւնը եւ 5-րդ շարասիւնը կար նաեւ Ուքրանիոյ  մէջ, որ արագ կերպով չէզոքացուեցաւ թշնամին դիմադրելու հարցին մէջ քաղաքական կամք դրսեւորած իշխանութեան կողմէ։ 

Զելենսկիի ուղերձը կրկնակի պատգամ է հայ ժողովուրդին՝ չյանձնուելու, չողբալու, փախուստի չդիմելու, վերածնունդի՝ որպէս ազգ եւ կռուելու սեփական իրաւունքներուն համար։ Ամէն մէկն իր տեղէն՝ փաթեթով մերժելու ռուս-թրքական ծրագիրներն ու անոնց հաւատարմութիւն յայտնածները։ Այդ պարագային պիտի գտնուին ե՛ւ դաշնակիցներ, ե՛ւ զէնք, ե՛ւ այլ աջակցութիւն։

Արեւմտեան Հայաստանը իր զօրակցութիւնը կը յայտնէ պատերազմի հետեւանքով տուժած ե՛ւ ռուս ե՛ւ ուքրանացի ժողովուրդին, եւ իր համերաշխութիւնը կը յայտնէ խաղաղութեան կարգաւորման գործընթացին: